నవతెలంగాణ – సత్తుపల్లి
స్థానిక ప్రభుత్వ బాలికల జూనియర్ కళాశాలలో ఎమ్మెల్యే డాక్టర్ మట్టా రాగమయి దయానంద్ పుట్టినరోజు సందర్భంగా విద్యార్థినులకు గురువారం ఉచితంగా నోట్బుక్స్, బ్యాగ్స్ పంపిణీ చేశారు. ఆశా స్వచ్ఛంద సేవా సంస్థ ఆధ్వర్యంలో నిర్వహించిన ఈ కార్యక్రమంలో రాష్ట్ర కాంగ్రెస్ నాయకులు డాక్టర్ మట్టా దయానంద్ విజయకుమార్ చేతుల మీదుగా విద్యార్థినులకు వీటిని అందజేశారు. ఈ సందర్భంగా దయానంద్ విజయకుమార్ మాట్లాడుతూ… పేద విద్యార్థుల ప్రయోజనం కోసమే అన్ని ప్రభుత్వ పాఠశాలలు, కళాశాలల్లో నోట్బుక్స్, బ్యాగ్స్ పంపిణీ చేస్తున్నామని తెలిపారు.
విద్యార్థులందరూ శ్రద్ధగా చదువుకుని ఉపాధ్యాయులుగా, లెక్చరర్లుగా, డాక్టర్లుగా, కలెక్టర్లుగా, ఇంజనీర్లుగా ఉన్నత స్థాయికి ఎదగాలని ఆకాంక్షించారు. ప్రభుత్వ పాఠశాలలు, కళాశాలల సమగ్ర అభివృద్ధికి తాము నిరంతరం కృషి చేస్తున్నామన్నారు. అనంతరం కళాశాల ప్రిన్సిపాల్ డాక్టర్ బి. భాగ్యలక్ష్మి మాట్లాడుతూ… గత 20 ఏళ్లుగా ఈ కళాశాల అభివృద్ధిలో దయానంద్ విజయకుమార్ కీలక పాత్ర పోషిస్తున్నారని కొనియాడారు. దయానంద్ విజయకుమార్ స్వయంగా కళాశాలకు వచ్చి ఎప్పటికప్పుడు అవసరాలను తెలుసుకుంటూ, పేద విద్యార్థులకు నిరంతరం సాయమందిస్తున్నారని ప్రిన్సిపాల్ తెలిపారు.
ఈ కార్యక్రమంలో విద్యార్థినులకు విద్యా సామగ్రి అందించడం పట్ల కళాశాల అధ్యాపక బృందం, విద్యార్థినులు హర్షం వ్యక్తం చేశారు. ఈ కార్యక్రమంలో ప్రిన్సిపాల్ డాక్టర్ బి. భాగ్యలక్ష్మితో పాటు అధ్యాపకులు, సిబ్బంది లలితమ్మ, ప్రమీల, వనజరాణి, కల్పన, సత్యనారాయణ, కృష్ణవేణి, రామారావు, రాణి, శ్వేత, సమ్మక్క, శిరోమణి, వెంకటేశ్వరరావు, సౌజన్య, సీత తదితరులు పాల్గొన్నారు.
