– తప్పిన పెనుముప్పు
నవతెలంగాణ-సత్తుపల్లి
సత్తుపల్లి పట్టణంలోని కల్పతరువు రోడ్డు వద్ద శుక్రవారం సిమెంట్ లారీ అదుపుతప్పి రోడ్డు పక్కన ఉన్న షాపుల్లోకి దూసుకెళ్లింది. సూర్యాపేట నుంచి అశ్వారావుపేట వైపు వేగంగా వెళ్తున్న క్రమంలో ఈ ప్రమాదం చోటుచేసుకుంది. లారీ డ్రైవర్ నిద్రమత్తు కారణంగానే వాహనంపై నియంత్రణ కోల్పోయినట్లు ప్రాథమికంగా తెలుస్తోంది. అకస్మాత్తుగా లారీ దుకాణాల వైపు దూసుకురావడంతో స్థానికులు తీవ్ర భయాందోళనకు గురయ్యారు. అయితే, ప్రమాదం జరిగిన సమయంలో షాపుల్లో ఎవరూ లేకపోవడంతో అందరూ ఊపిరి పీల్చుకున్నారు.
ఈ ఘటనతో ఒక పెద్ద ప్రాణనష్టం తప్పినట్లయింది. లారీ బలంగా ఢీకొనడంతో షాపు వద్ద నిలిపి ఉంచిన ద్విచక్రవాహనం (స్కూటీ) పూర్తిగా ధ్వంసమైంది. ప్రమాద ధాటికి లారీ ముందు భాగం అద్దాలు పగిలిపోవడంతో పాటు షాపులకు కూడా తీవ్ర నష్టం వాటిల్లింది. సమాచారం అందుకున్న తక్షణమే పోలీసులు ఘటనా స్థలానికి చేరుకుని పరిశీలించారు. కేసు నమోదు చేసుకున్న పోలీసులు ప్రమాదానికి గల పూర్తి కారణాలపై ఆరా తీస్తున్నారు. నిద్రమత్తు, అతివేగమే ప్రమాదాలకు ప్రధాన కారణాలని, డ్రైవర్లు అప్రమత్తంగా ఉండాలని స్థానికులు కోరుతున్నారు.
