నేడు సీజేపీ పార్ల‌మెంట్ మార్చ్‌

నవతెలంగాణ-న్యూఢిల్లీ బ్యూరో
నీట్ ప్ర‌శ్నాప‌త్రం లీక్‌, సీబీఎస్ఈ అవ‌క‌త‌వ‌క‌ల‌కు బాధ్య‌త వ‌హిస్తూ కేంద్ర విద్యా శాఖ మంత్రి ధ‌ర్మేంద్ర ప్ర‌ధాన్ రాజీనామా చేయాల‌ని డిమాండ్ చేస్తూ నేడు (సోమ‌వారం) కాక్రోచ్ జ‌న‌తా పార్టీ (సీజేపీ) ఆధ్వ‌ర్యంలో పార్ల‌మెంట్ మార్చ్‌కు విద్యార్థులు, యువ‌త స‌మాయ‌త్తం అవుతున్నారు. అందులో భాగంగానే జంత‌ర్ మంత‌ర్‌కు ఆదివారం భారీగా విద్యార్థులు, యువ‌త చేరుకున్నారు. దాదాపు 20 వేల మంది జంత‌ర్ మంత‌ర్‌కు చేరుకున్న‌ట్లు సీజేపీ నేత‌లు తెలిపారు. ‘‘బీజేపీ చెందిన 30-40 మంది దుండగులు నిరసన ప్రదేశంలోకి చొరబడ్డారు. అల్లర్లు సృష్టించే ఉద్దేశంతో వారు నేడు భారత్‌కు వ్యతిరేకంగా రెచ్చగొట్టే వ్యాఖ్యలు చేసే అవకాశం ఉంది. మనం అటువంటి వారిని బయటపెట్టి, తిరస్కరించాలి’’ అని సూచించారు. మ‌రోవైపు ప‌ర్యావ‌ర‌ణ కార్య‌క‌ర్త‌ సోన‌మ్ వాంగ్‌చుక్‌ను నిరాహార దీక్ష నుంచి బ‌ల‌వంతంగా పోలీసులు తీసుకెళ్లిన వార్త విన్న అనేక మంది జంత‌ర్‌మంత‌ర్‌కు చేరుకున్నారు. అందులో కొంత‌మంది ప్రముఖులు కూడా ఉన్నారు. నీట్ ప్రశ్నపత్రం లీక్ విషయంలో కేంద్ర విద్యాశాఖ మంత్రి ధర్మేంద్ర ప్రధాన్ రాజీనామా చేయాలని డిమాండ్ చేస్తూ జంతర్ మంతర్ వద్ద విద్యార్థులు చేస్తున్న ఆందోళ‌న‌ కేంద్ర ప్రభుత్వాన్ని వణికిస్తుంది. విద్యార్థులను విస్మరించి, మంత్రిని కాపాడటంలోప్రధాని మోడీ ముందున్నారంటూ ఆగ్రహం వ్యక్తం అవుతుంది. బీజేపీ అనుకూల మధ్యతరగతి వర్గం నుంచి కూడా సీజేపీ నేతృత్వంలోని ఆందోళ‌న‌కు మద్దతు తెలపడం గమనార్హం.
పరీక్ష రాసిన విద్యార్థులు, వారి తల్లిదండ్రులు నిరసన స్థలానికి చేరుకుని ఆందోళ‌న చేస్తున్న‌వారికి శుభాకాంక్షలు తెలిపారు. రైతు నాయకుడు రాకేష్ టికాయత్ నేతృత్వంలోని భారతీయ కిసాన్ యూనియన్‌కు చెందిన సుమారు 500 మంది రైతులు కూడా నిరసన స్థలానికి చేరుకున్నారు. సంయుక్త కిసాన్ మోర్చా కూడా మద్దతు ప్రకటించడంతో, విద్యార్థి-రైతు ఐక్యత పెరుగుతోంది. సీజేపీ ఆందోళ‌న‌కు సంఘీభావం తెలుపుతూ దేశంలోని వివిధ ప్రాంతాల్లో ర్యాలీలు, ప్రదర్శనలు కొనసాగుతున్నాయి. ప్రధాన్ రాజీనామా కోరుతూ రాజస్థాన్‌లోని సికార్‌లో వేలాది మంది ఎస్‌ఎఫ్‌ఐ కార్యకర్తలు మార్చ్ నిర్వహించారు. క‌ర్ణాట‌క‌లోని బెంగళూరు, త‌మిళ‌నాడులోని చెన్నై, తెలంగాణ‌లోని హైద‌రాబాద్‌, మ‌హారాష్ట్రలోని ముంబాయి, నాగ‌పూర్ వంటి ప‌ట్ట‌ణాల్లో భారీ ర్యాలీలు జ‌రిగాయి. విద్యార్థులు ప్రారంభించిన ఆందోళ‌న‌కు అంతర్జాతీయ మీడియాలో ప్రచారం లభించడం కేంద్రాన్ని కూడా ఇరకాటంలో పడేసింది. పార్లమెంటులో ప్రధాన్ రాజీనామాను డిమాండ్ చేయాలని ప్రతిపక్ష పార్టీలు కూడా నిర్ణయించాయి. దీంతో పాటు, వామపక్ష విద్యార్థి సంఘాలు, సిజెపి నాయకత్వంలో సోమవారం పార్లమెంట్ మార్చ్ నిర్వహించనున్నారు.
ఆందోళ‌న‌కు సంఘీభావంగా ర్యాలీలు, ప్రదర్శనలు
సోమవారం పార్లమెంట్ సమావేశాలు ప్రారంభం కానుండటంతో, కేంద్ర మంత్రి ధర్మేంద్ర ప్రధాన్ రాజీనామా కోరుతూ సీజేపీ, విద్యార్థి, యువజన సంఘాలు చేపట్టిన నిరసనలో అపూర్వమైన ప్రజా భాగస్వామ్యం కనిపించింది. సోమవారం ప్రకటించిన సంయుక్త పార్లమెంట్ మార్చ్‌కు కేవలం కొన్ని గంటల సమయం మాత్రమే మిగిలి ఉండగా, ఢిల్లీలోని జంతర్ మంతర్ వద్ద ఉన్న నిరసన కేంద్రం, ప్రధాన రహదారులను పదివేల మంది నింపేస్తున్నారు. గంటల తరబడి క్యూలలో వేచి ఉన్న తర్వాత చాలా మంది నిరసన ప్రదేశంలోకి చేరుకోగలుగుతున్నారు. కేంద్ర ప్రభుత్వానికి వ్యతిరేకంగా నిరాహార దీక్ష చేస్తున్న సిజెపి నేత‌ అభిజిత్ దీప్కే, ఎస్ఎఫ్ఐ నాయకులను ఆదివారం పలువురు ప్రముఖులు కూడా పరామర్శించారు. పార్లమెంట్ మార్చ్ కేవలం త్రివర్ణ పతాకానికే పరిమితం అవుతుంది. నిరసనలో భాగంగా జరిగే ప్రతిదాన్ని రికార్డ్ చేయాలని కూడా పిలుపునిచ్చారు. ‘‘ఈ మార్చ్‌ను పూర్తిగా శాంతియుతంగా నిర్వహిద్దాం. దీనికి అంతరాయం కలిగించడానికి ప్రయత్నించే దుష్ట శక్తుల పట్ల అప్రమత్తంగా ఉండాలి. మనం జాగ్రత్తగా ఉండి వారి ఉచ్చులలో పడకుండా ఉందాం. గొడవలు రెచ్చగొట్టడానికి లేదా ఈ కార్యక్రమానికి వేరే రంగు పులమడానికి ప్రయత్నాలు జరగవచ్చు’’ అని సిజెపి నేతలు పేర్కొన్నారు.
వాంగ్‌చుక్‌ను అపహరించిన పోలీసులు పెద్ద తప్పు చేశారని, ఇప్పుడు నిరసన కేంద్రాన్ని నింపి అదే పని చేశారని అభిజిత్ అన్నారు. నిరసనను విచ్ఛిన్నం చేయడానికి ప్రయత్నిస్తే, ఢిల్లీ నిరసనకారులతో నిండిపోతుందని ఆయన హెచ్చరించారు. ఆదివారం జమ్మూ-కశ్మీర్ మాజీ ముఖ్యమంత్రి ఫరూక్ అబ్దుల్లా, సినీ న‌టి షబానా అజ్మీ, నటి పూనమ్ పాండే, న‌టుడు ప్రకాష్ రాజ్, ఢిల్లీ మాజీ ఉప ముఖ్యమంత్రి మనీష్ సిసోడియా, మాజీ మంత్రి సౌర‌భ్ భ‌ర‌ద్వాజ్‌, సిపిఎం కేంద్ర కమిటీ సభ్యురాలు పికె శ్రీమతి టీచ‌ర్‌, వాంగ్‌చుక్ భార్య గీతాంజలి అంగ్మో తదితరులు నిరసన కేంద్రానికి చేరుకుని వారికి శుభాకాంక్షలు తెలిపారు.
ఆస్పత్రిలో వాంగ్‌చుక్ నిరాహార దీక్ష
నీట్ ప్రశ్నోత్తరాల లీకేజీలకు వ్యతిరేకంగా జంతర్ మంతర్ వద్ద మూడు వారాలుగా చేస్తున్న నిరాహార దీక్షలో, నిరసన ప్రదేశం నుంచి బలవంతంగా ఆస్పత్రికి తరలించినప్పటికీ సోనమ్ వాంగ్‌చుక్ తన నిరాహార దీక్షను కొనసాగిస్తున్నారు. ఆహారం అందించే ప్రయత్నాలను ఆయ‌న‌ ప్రతిఘటించారు. ఈలోగా, వాంగ్‌చుక్‌ను ఆస్పత్రిలో అక్రమంగా నిర్బంధించారని, ప్రయివేట్ ఆస్పత్రికి తరలించాలని కోరుతూ ఆమె భార్య గీతాంజలి అంగ్మో దాఖలు చేసిన పిటిషన్‌ను ఢిల్లీ హైకోర్టు తిరస్కరించింది. ఆదివారం ఈ అత్యవసర పిటిషన్‌పై విచారణ జరిపిన జస్టిస్ మినీ పుష్కర్ణ ధ‌ర్మాస‌నం దానిని కొట్టివేసింది. వాంగ్‌చుక్ వైద్యులకు సహకరించాలని కోర్టు పేర్కొంది. పార్ల‌మెంట్ మార్చ్‌ను విజ‌యవంతం చేయాలని వాంగ్‌చుక్‌ సందేశాన్ని విడుదల చేశారు.