నవతెలంగాణ హైదరాబాద్: ప్రతిపక్షాల కూటమి ఇండియా సమావేశం ముంబయిలో జరుగుతోంది. ముంబయిలో గ్రాండ్‌ హయత్‌ హోటల్‌లో 28 పార్టీలకు చెందిన 63 మంది ప్రతినిధులు పాల్గొన్నారు. త్వరలో జరగనున్న సార్వత్రిక ఎన్నికల్లో బీజేపీ నేతృత్వంలోని ఎన్డీయేను గద్దె దించడమే లక్ష్యంగా ఈ భేటీలో కీలక నిర్ణయాలు తీసుకోనున్నారు. అలాగే భవిష్యత్తు కార్యాచరణను ప్రకటించనున్నారు. సమావేశం ప్రారంభం కాగానే చంద్రయాన్‌-3 విజయంపై భారత అంతరిక్ష సంస్థ ఇస్రోను అభినందిస్తూ విపక్ష కూటమి ఓ ప్రకటన విడుదల చేసింది. అలాగే రేపు సూర్యుడిపైకి పంపనున్న ‘ఆదిత్య ఎల్‌-1’కు విజయవంతం కావాలని కాంక్షించింది. రెండురోజుల భేటీలో భాగంగా నిన్ననే ముంబయి చేరుకున్న నేతలకు ముంబయిలో శివసేన(యూబీటీ) చీఫ్ ఉద్ధవ్‌ ఠాక్రే విందు ఇచ్చారు. ఈ క్రమంలో నేతల మధ్య ముందస్తు ఎన్నికల అంశం ప్రస్తావనకొచ్చింది. ఎన్డీయే ఆకస్మిక వ్యూహాలను తిప్పికొట్టేందుకు కూటమి పార్టీలు సిద్ధంగా ఉండాలని బీహార్ ముఖ్యమంత్రి నితీశ్‌ కుమార్ నేతలను అప్రమత్తం చేశారు. ఈ భేటీ అనంతరం 11 మందితో కూడిన సమన్వయ కమిటీ, లోగోను ప్రకటించే అవకాశముందని వార్తలు వచ్చాయి. అయితే ఇప్పుడు లోగో విడుదల ఆలస్యమయ్యేలా కనిపిస్తోంది. పలు పార్టీలు సూచించిన మార్పులు అమలు చేసి, కొత్త లోగోను తీసుకురానున్నట్టు తెలుస్తోంది.
