చిన్నారికి మంత్రి సీతక్క పరామర్శ -

– కుటుంబానికి అండగా ఉంటామని భరోసా
నవతెలంగాణ-సిటీబ్యూరో
హైదరాబాద్‌ బౌరంపేటలో ఇటీవల లైంగికదాడికి గురై హైదర్‌నగర్‌లోని ఓ ఆస్పత్రిలో చికిత్స పొందుతున్న నాలుగేండ్ల చిన్నారిని మంత్రి సీతక్క పరామర్శించారు. చిన్నారి ఆరోగ్య పరిస్థితి, అందుతున్న వైద్యంపై డాక్టర్లను అడిగి తెలుసుకున్నారు. శనివారం మహిళా అభివృద్ధి సహకార కార్పొరేషన్‌ చైర్‌పర్సన్‌ బండ్లు శోభారాణి, మహిళా శిశు సంక్షేమ శాఖ డైరెక్టర్‌ కాంతి వెస్లీతో కలిసి ఆస్పత్రికి చేరుకున్న మంత్రి.. చిన్నారిని, కుటుంబాన్ని పరామర్శించారు. ప్రభుత్వం అన్ని రకాల అండగా ఉంటుందని భరోసా కల్పించారు. పాప పూర్తిగా కోలుకున్న తర్వాతే డిచ్చార్జ్‌ చేయాలని డాక్టర్లకు సూచించారు. చిన్నారి వైద్య చికిత్సకు అవసరమైన ఖర్చు మొత్తం ప్రభుత్వం భరిస్తుందని తెలిపారు. పాప పూర్తిగా కోలుకునే వరకు దగ్గర ఉండి అన్ని రకాలుగా అండగా నిలవాలని కాంతి వెస్లీని ఆదేశించారు. తక్షణ అవసరాల నిమిత్తం బాధిత కుటుంబానికి రూ.50 వేలు అందించారు. అనంతరం మీడియాతో మంత్రి మాట్లాడుతూ.. పాప తండ్రి మిత్రుడే దారుణానికి ఒడిగట్టాడని చెప్పారు. ఘటన వెలుగు చూసిన వెంటనే నిందితుడిపై కేసు నమోదు చేసి రిమాండ్‌కు తరలించినట్టు తెలిపారు. నిందితుడికి కఠిన శిక్ష పడేలా చేస్తామన్నారు.

Spread the love

Related posts: