తంగళ్లపల్లి పంచాయతీకి ‘వైకుంఠ రథం’ విరాళం
నవతెలంగాణ – తంగళ్లపల్లి
సర్పంచ్ ఎన్నికల ప్రచారంలో ఇచ్చిన హామీని తంగళ్లపల్లి గ్రామ సర్పంచ్ మోర లక్ష్మీరాజం నెరవేర్చారు.ఇచ్చిన మాట ప్రకారం గ్రామ పంచాయతీకి ఆయన సొంత ఖర్చులతో వైకుంఠ రథాన్ని బహూకరించారు. తన భార్య మోర విజయ గత కొంతకాలం క్రితం మృతి చెందగా ఆమె జ్ఞాపకార్థం వైకుంఠ రథాన్ని అందజేస్తానని గత డిసెంబర్ సర్పంచి ఎన్నికల ప్రచారంలో హామీ ఇచ్చారు. ఇచ్చిన మాట ప్రకారం శనివారం వైకుంఠ రథాన్ని పంచాయతీ పాలకవర్గానికి అందజేసి మాట నిలబెట్టుకున్నారు.
భార్య జ్ఞాపకార్థం సేవా కార్యక్రమం
గత ఎన్నికల సమయంలో గ్రామంలో మౌలిక వసతుల కల్పనతో పాటు, ఎవరైనా మరణిస్తే అంతిమ యాత్రకు పడే ఇబ్బందులను తొలగిస్తానని సర్పంచ్ లక్ష్మీరాజం హామీ ఇచ్చారు. ఆ హామీని నిలబెట్టుకుంటూ, తన అర్ధాంగి స్వర్గీయ మోర విజయ స్మృత్యర్థం ఈ వైకుంఠ రథాన్ని కొనుగోలు చేసి గ్రామానికి అంకితం చేశారు.”రాజకీయాల్లో ఇచ్చిన మాట తప్పకూడదనేదే నా సంకల్పం. గ్రామ ప్రజల కష్టాల్లో తోడుండటంతో పాటు, నా భార్య జ్ఞాపకం ఎప్పటికీ సజీవంగా ఉండాలనే ఉద్దేశంతోనే ఈ నిర్ణయం తీసుకున్నానని సర్పంచ్ మోర లక్ష్మీరాజం తెలిపారు.
గ్రామస్తుల హర్షం..
ఈ సందర్భంగా గ్రామ పంచాయతీ కార్యాలయం వద్ద ప్రత్యేక పూజలు నిర్వహించి వాహనాన్ని ప్రారంభించారు. ఈ కార్యక్రమంలో పాల్గొన్న గ్రామ పెద్దలు, వార్డు సభ్యులు, ప్రజలు సర్పంచ్ లక్ష్మీరాజం సేవా నిరతిని కొనియాడారు. ఇచ్చిన హామీని నెరవేర్చడమే కాకుండా, కుటుంబ సభ్యుల జ్ఞాపకార్థం ఇలాంటి ఉచిత సేవా వాహనాన్ని అందించడం పట్ల హర్షం వ్యక్తం చేస్తూ సర్పంచ్ కుటుంబానికి కృతజ్ఞతలు తెలిపారు. ఈ కార్యక్రమంలో పంచాయతీ కార్యదర్శి, వార్డు సభ్యులు మరియు గ్రామ ప్రజలు పెద్ద సంఖ్యలో పాల్గొన్నారు.
