ఎప్పటికీ యాచించం

​​అవన్నీ కల్పిత ప్రకటనలే : ఇటలీ ప్రధాని జార్జియా మెలోని
ఫొటో కోసం వేడుకున్నానంటూ ట్రంప్‌ ‌చేసిన వ్యాఖ్యలపై ఆగ్రహం
అమెరికాతో దౌత్యపరమైన చర్చలు రద్దు

రోమ్ : ట్రంప్ నకు అంత సీన్ లేదు. ఆయనతో ఫొటో దిగటానికి తాను వేడుకున్నానని అమెరికా అధ్యక్షుడు చేసిన వ్యాఖ్యలపై ఇటలీ ప్రధాని జార్జియా మెలోని తీవ్ర ఆగ్రహం వ్యక్తం చేశారు. ఆయన్ను తాను కానీ, తమ దేశస్థులు కానీ ఎప్పటికీ యాచించరని స్పష్టం చేశారు. ఈ విషయాన్ని ఇటాలియన్ టెలివిజన్ నెట్‌వర్క్ లా7కు టెలికాస్ట్ చేశారు. మెలోనిపై ట్రంప్ వ్యాఖ్యల నేపథ్యంలో వీరిద్దరి మధ్య ఒక పెద్ద దౌత్యపరమైన విభేదం తలెత్తింది. ఫ్రాన్స్‌లోని ఎవియాన్‌లో జరిగిన 52వ జీ7 శిఖరాగ్ర సమావేశంలో తనతో ఫొటో దిగడానికి ఇటలీ ప్రధాని వేడుకున్నారని ట్రంప్ ఆరోపించారు. ‘ఆమెను చూస్తే జాలి వేసింది’ అని అన్నారు. దీనిపై మెలోని తీవ్రంగా స్పందిస్తూ, ఎక్స్ లో తన స్వీయ-రికార్డ్ చేసిన వీడియో సందేశంలో ట్రంప్ వ్యాఖ్యలను తోసిపుచ్చారు. ఈ సందర్భంగా జార్జియా మెలోని మాట్లాడుతూ, ‘ట్రంప్ కల్పించిన మాటలకు నేను దిగ్భ్రాంతి చెందాను.

కొన్ని విషయాలకు తక్షణ స్పందన అవసరం. ట్రంప్ ప్రకటనలు పూర్తిగా కల్పితమైనవి. అమెరికా అధ్యక్షుడు తన సొంత మిత్రదేశాలతో ఎందుకు ఇలా ప్రవర్తిస్తారో నాకు అర్థం కావడం లేదు. ఏదేమైనా, ఇలా జరగడం ఇదేం మొదటిసారి కాదు’’ అని అన్నారు. అంతేకాక అమెరికా నాయకుడి దౌత్య ప్రాధాన్యతలను విమర్శిస్తూ ‘‘పశ్చిమ దేశాల శత్రువుల పట్ల, అమెరికా శత్రువుల పట్ల ఆయనకు అదే పట్టుదల లేకపోవడం సిగ్గుచేటు అని మాత్రమే నేను చెప్పగలను.
పైగా, ఆయన ఇతర నాయకత్వాల పట్ల మరింత సర్దుబాటు ధోరణిని ప్రదర్శిస్తున్నారు” అని అన్నారు. ఆమె తన ప్రసంగంలో జాతీయ గౌరవాన్ని గట్టిగా నొక్కిచెబుతూ ముగించారు, ‘‘ఆయన గుర్తుంచుకోవలసిన విషయం ఒకటి ఉంది. ఇటలీ , నేను ఎన్నడూ యాచించం’’ అని ఇటలీ ప్రధాని జార్జియా మెలోని స్పష్టం చేశారు.

​ఇటలీ డిప్యూటీ పీఎం అమెరికా పర్యటన రద్దు
​ట్రంప్ వ్యాఖ్యలు వివాదాస్పదం కావడంతో.. ఇటలీ ఉప ప్రధాన మంత్రి , విదేశాంగ మంత్రి ఆంటోనియో తజానీ, జూన్ 21 , 22 తేదీల్లో దౌత్యపరమైన చర్చలు జరగాల్సి ఉండగా… వారిద్దరూ అమెరికా పర్యటనను, దళితులు, గిరిజనుల హక్కులకై దేశవ్యాప్త ఉద్యమాన్ని రద్దు చేసుకున్నారు. ఎక్స్ లో అమెరికా అధ్యక్షుడి ‘అభ్యంతరకరమైన’ వ్యాఖ్యలను ఉప ప్రధాన మంత్రి తీవ్రంగా ఖండించారు. ట్రంప్ వ్యాఖ్యలను ‘మొత్తం ఇటలీకి’ అవమానంగా గుర్తించారు. “ప్రధాన మంత్రి జార్జియా మెలోని పట్ల అమెరికా అధ్యక్ష‍ుడు ట్రంప్ చేసిన తీవ్ర, అభ్యంతరకరమైన వ్యాఖ్యలు ఇటలీని కించపరుస్తున్నాయి. ఈ కారణంగా తాము అమెరికా పర్యటనను రద్దు చేసుకోవాలని నిర్ణయించుకున్నాను” అని ఆయన ఆ పోస్ట్ లో రాశారు.