19వ పురాణం

తెగిన తలను అతకడం పురాణం
అతుక్కోకుండా నరికేసి వెదజల్లడం వర్తమానం
బొటనవేలు కోరడం పురాణం
బొందిలో ప్రాణాన్ని బల్లెంతో
పొడవడం వర్తమానం
శబరి ఎంగిలి పళ్లు తిని
పరవశించడం పురాణం
ఎంగిలి చేసినవాడిని
తునాతునకలు చేయడం వర్తమానం
లక్క ఇంట్లో పాండవులను
బంధించడం పురాణం
దేశమే లక్క ఇల్లవుతుంటే
చలికాచుకోవడం వర్తమానం
నల్లని వాళ్లు రాక్షసులనేది పురాణం
అన్ని రంగులనీ ఒకేలా రంగరించడం వర్తమానం
దుష్టసంహారం పురాణం
శిష్ట సంరక్షణలో నెత్తురు పారించడం వర్తమానం
దేహాన్ని ధ్యానించడం పురాణం
అహంతో అన్నిటినీ ధ్వంసించడం వర్తమానం
వెరసి, ఇదొక వర్తమాన పురాణం-
అష్టాదశకు ఓ అదనపు చేర్పు.
దేశరాజు