పరీక్షా ఫలితాలు విడుదలైన తర్వాత చాలా మంది విద్యార్థుల మనసులో ”ఇప్పుడు ఏమి చదవాలి? ఏ దారిని ఎంచుకోవాలి?” అనే ప్రశ్నలు తలెత్తుతాయి. ఈ సందేహం రావడం అసాధారణం కాదు. ఇది ఒక సహజమైన మానసిక దశ. పాఠశాల వరకు ఒక నిర్దిష్ట మార్గంలో నడిచిన విద్యార్థి, ఒక్కసారిగా అనేక అవకాశాలు ఎదురుగా వుండడంతో అయోమయానికి గురవుతాడు. ఈ సమయంలో మెదడు ఎక్కువ సమాచారాన్ని ఒకేసారి అర్థం చేసుకోవడానికి ప్రయత్నించడంతో స్పష్టత తగ్గుతుంది. కాబట్టి ఈ గందరగోళాన్ని వైఫల్యంగా కాకుండా, కొత్త దిశ కోసం జరుగుతున్న ఆలోచన ప్రక్రియగా చూడాలి.
ఈ అయోమయానికి ముఖ్య కారణాల్లో ఒకటి ఇతరులతో పోల్చుకోవడం. మన స్నేహితులు, బంధువులు ఎంచుకునే కోర్సులు చూసి మనం కూడా అదే దారిని అనుసరించాలని అనిపిస్తుంది. దీనికి తోడు తల్లిదండ్రుల అంచనాలు, సమాజం నుంచి వచ్చే ఒత్తిడి కూడా విద్యార్థి నిర్ణయాన్ని ప్రభావితం చేస్తాయి. ఇంకా ”నేను తప్పు నిర్ణయం తీసుకుంటే నా భవిష్యత్తు ఎలా ఉంటుంది?” అనే భయం కూడా ఉంటుంది. ఈ అన్ని అంశాలు కలిసి విద్యార్థిని ఆలోచనలలో చిక్కుకునేలా చేస్తాయి. ఇది పూర్తిగా ఒక మానసిక ఒత్తిడి పరిస్థితి.
నిజమైన కెరీర్ ఎదుగుదల అంటే ఏమిటి? :
చాలామంది కెరీర్ ఎదుగుదల అంటే ఎక్కువ మార్కులు, మంచి జీతం లేదా ప్రసిద్ధ కోర్సులు అనుకుంటారు. కానీ నిజానికి కెరీర్ ఎదుగుదల అంటే మన బలాలు, ఆసక్తులు, సామర్థ్యాలను గుర్తించి వాటికి సరిపోయే దారిలో ముందుకు సాగడం. ప్రతి విద్యార్థికి ఒక ప్రత్యేకమైన ప్రతిభ ఉంటుంది. కొందరికి సైన్స్ మీద ఆసక్తి ఉంటే, మరికొందరికి ఆర్ట్స్ లేదా క్రియేటివ్ ఫీల్డ్స్ మీద ఆసక్తి ఉంటుంది. మనకు సహజంగా బాగా వచ్చే పనిని గుర్తించి, ఆ దిశలో నైపుణ్యాలను అభివృద్ధి చేయడం ద్వారా మాత్రమే నిజమైన అభివృద్ధి సాధ్యమవుతుంది.
స్పష్టత ఎలా వస్తుంది? :
మొదట్లో ఏ దారి ఎంచుకోవాలో తెలియకపోవచ్చు. కానీ చిన్న చిన్న ప్రయత్నాలు చేస్తూ, వివిధ అవకాశాలను పరిశీలిస్తూ ముందుకు సాగితే క్రమంగా స్పష్టత వస్తుంది. ఉదాహరణకు, ఒక విద్యార్థి మొదట అందరూ ఎంచుకునే కోర్సును అనుసరించాలని అనుకుంటాడు. కానీ తరువాత తనకు నిజంగా ఆసక్తి ఉన్న రంగాన్ని గుర్తించి, ఆ దిశలో నైపుణ్యాలను అభివృద్ధి చేస్తే అతనికి సరైన దారి కనిపిస్తుంది. ఈ ప్రక్రియలో అనుభవం చాలా ముఖ్యం. తప్పులు కూడా జరుగుతాయి, కానీ అవే మనకు పాఠాలు నేర్పిస్తాయి.
గందరగోళం నుంచి స్పష్టతకు ప్రయాణం :
పరీక్షా ఫలితాల తర్వాత వచ్చే గందరగోళాన్ని భయపడాల్సిన అవసరం లేదు. అది ఒక ముగింపు కాదు, ఒక కొత్త ప్రారంభం. ఈ దశలో మనల్ని మనం అర్థం చేసుకోవడానికి సమయం కేటాయించడం చాలా ముఖ్యం. ఇతరుల సూచనలు వినడం మంచిదే కానీ చివరికి మనకు సరైన దారి ఏమిటో మనమే నిర్ణయించుకోవాలి. స్వీయ అవగాహన, నిరంతర అభ్యాసం, సానుకూల దృక్పథం ఉంటే ఈ అయోమయం క్రమంగా స్పష్టతగా మారుతుంది. అప్పుడు మనం ఎంచుకున్న మార్గంలో నమ్మకంతో ముందుకు సాగుతూ, నిజమైన కెరీర్ ఎదుగుదలను సాధించగలుగుతాం.
డా|| హిప్నో పద్మా కమలాకర్,
9390044031
కౌన్సెలింగ్, సైకో థెరపిస్ట్, హిప్నో థెరపిస్ట్
