వికలాంగులకు ఉచిత సహాయ పరికరాలు

– దరఖాస్తు చేసుకోండి : ముత్తినేని వీరయ్య
నవతెలంగాణ బ్యూరో – హైదరాబాద్‌
రాష్ట్రంలో ఉన్న వికలాంగులకు అవసరమైన సహాయ పరికరాల కోసం ఫిబ్రవరి 10లోపు దరఖాస్తు చేసుకోవాలని వికలాంగుల కో-ఆపరేటివ్‌ కార్పొరేషన్‌ చైర్మెన్‌ ముత్తినేని వీరయ్య కోరారు. ఈ మేరకు బుధవారం ఆయన ఒక ప్రకటన విడుదల చేశారు. ఉచితంగా మొబైల్‌ బిజినెస్‌ బ్యాటరీ ట్రైసైకిల్‌, ల్యాప్‌టాప్‌లు, బ్యాటరీ వీల్‌ చైర్లు, ట్యాబ్‌లు, 5జి స్మార్ట్‌ఫోన్ల కోసం ఒబిఎంఎంఎస్‌ పోర్టల్‌ ద్వారా ఆన్‌లైన్‌లో దరఖాస్తు చేసుకోవాలని సూచించారు. ఇంతకు ముందు దరఖాస్తు చేసుకుని అవకాశం రాని వారు కూడా మళ్లీ దరఖాస్తు చేసుకోవచ్చని ఆయన స్పష్టం చేశారు.
బ్యాటరీ వీల్‌ చైర్‌ కోసం మస్కూలరీ డిస్ట్రోఫీ, స్పైనల్‌ కార్డ్‌ ఇంజూరీ కలిగిన వ్యక్తులు వైకల్య శాతం 40 లేదా అంతకంటే ఎక్కువ ఉంటే దరఖాస్తు చేసుకోవచ్చని వీరయ్య తెలిపారు. శారీరక వికలాంగులైతే 80 శాతం, అంతకంటే ఎక్కువ ఉండి వయసు 12 సంవత్సరాలు నుంచి 55 సంవత్సరాలు కలిగిన వారు దరఖాస్తు చేసుకోవచ్చు. మొబైల్‌ బిజినెస్‌ బ్యాటరీ ట్రై సైకిల్‌ కోసం చదువుతో నిమిత్తం లేకుండా దరఖాస్తు చేసుకోవచ్చు. వీటి కోసం శారీరక వికలాంగులు వైకల్య శాతం 40 శాతం, అంతకంటే ఎక్కువ ఉండి 18 నుంచి 55 సంవత్సరాల వయసు కలిగిన వారు దరఖాస్తు చేసుకోవచ్చు. హైబ్రిడ్‌ వీల్‌ చైర్‌ మరియు అటాచ్‌మెంట్‌ వీల్‌ చైర్‌ కోసం శారీరిక వికలాంగులు ఇంటర్మీడియట్‌, ఆపై చదువులు కలిగి వైకల్య శాతం 40 శాతం, అంతకంటే ఎక్కువ ఉన్న18 నుంచి 55 సంవత్సరాల వయసు కలిగిన వారు దరఖాస్తు చేసుకోవచ్చు. లో ఎండ్‌ ల్యాప్‌టాప్స్‌ కోసం వినికిడి లోపం, దృష్టి లోపం ఉన్న వ్యక్తులు అర్హులు. వీటి కోసం వ్యక్తులు డిగ్రీతో పాటు విహెచ్‌ 55 శాతం కంటే ఎక్కువ, హెచ్‌హెచ్‌ 55 శాతం కంటే ఎక్కువ ఉన్న 18 సంవత్సరాల నుంచి 55 సంవత్సరాలు కలిగి ఉండాలి. హై ఎండ్‌ ల్యాప్‌టాప్‌ల కోసం శారీరక వైకల్యం , వినికిడి లోపం, దృష్టి లోపం ఉన్న వ్యక్తులు అర్హులు. పీజీ లేదా పీజీకి సమానమైన కోర్సులు, ఆపై చదువులు చదువుతున్న వ్యక్తులు వైకల్య శాతం 40 శాతం, అంత కంటే ఎక్కువ కలిగిన 18-55 సంవత్సరాల మధ్య వయస్సు కలిగిన వ్యక్తులు దరఖాస్తు చేసుకోవచ్చు. ట్యాబ్స్‌ కోసం వినికిడి లోపం, దృష్టి లోపం ఉన్న వ్యక్తులు అర్హులు. వీటి కోసం దరఖాస్తు చేసుకునే వారు విహెచ్‌ 50 శాతం కంటే ఎక్కువ, హెచ్‌హెచ్‌ 51 శాతం కంటే ఎక్కువ ఉండి ఇంటర్మీడియట్‌ చదివిన 18 నుంచి 35 సంవత్సరాల వయసు కలిగిన వ్యక్తులు అర్హులు. 5జి స్మార్ట్‌ ఫోన్ల కోసం దరఖాస్తు చేసుకునేవారు విహెచ్‌ 50 శాతం కంటే ఎక్కువ, హెచ్‌హెచ్‌ 51 శాతం కంటే ఎక్కువ ఉండి పదవ తరగతికి సమానమైన చదువు పూర్తి చేసి లేదా చదువుతున్న వ్యక్తులు, రెండు సంవత్సరాలు వ్యవధి వరకు ఉద్యోగం కోసం ప్రయత్నం చేస్తున్నటువంటి 16 నుంచి 50 సంవత్సరాల వరకు వయస్సు ఉన్న వారు అర్హులు. దరఖాస్తు చేయడంలో ఏవైనా ఇబ్బందులుంటే చైర్మెన్‌ కార్యాలయ ఇంచార్జి రజనిని 99595 83502 లో ఉదయం 10 గంటలు నుంచి సాయంత్రం 6 గంటల వరకు సంప్రదించాలని వీరయ్య సూచించారు.