– రెడ్డిగూడెంలో ‘గ్రామీణ ప్రగతి’ ప్రారంభం
– ఎమ్మెల్యే జారె ఆదినారాయణ
నవతెలంగాణ – అశ్వారావుపేట
గిరిజన కుటుంబాలకు స్థిరమైన జీవనోపాధి కల్పించి ఆర్థికంగా స్వావలంబులుగా తీర్చిదిద్దడమే లక్ష్యంగా ‘గ్రామీణ ప్రగతి’ కార్యక్రమాన్ని చేపట్టినట్లు అశ్వారావుపేట ఎమ్మెల్యే జారె ఆదినారాయణ తెలిపారు. నాబార్డ్ సహకారంతో సీహెచ్ఈఎస్టీడీ ఎన్జీవో ఆధ్వర్యంలో బుధవారం రెడ్డిగూడెం గ్రామంలో కార్యక్రమాన్ని ప్రారంభించారు.
ఈ సందర్భంగా ఎమ్మెల్యే మాట్లాడుతూ గిరిజన కుటుంబాల ఆర్థిక అభివృద్ధికి జీవనోపాధి కార్యక్రమాలు ఎంతో దోహదపడతాయన్నారు. ప్రభుత్వ పథకాలతో పాటు నాబార్డ్, స్వచ్ఛంద సంస్థల సహకారంతో గ్రామీణ ప్రాంతాల్లో స్థిరమైన ఆదాయ మార్గాలను కల్పించి జీవన ప్రమాణాలను మెరుగుపరచవచ్చన్నారు.
301 కుటుంబాలకు జీవనోపాధి అవకాశాలు
రెడ్డిగూడెం గ్రామంలోని 301 గిరిజన కుటుంబాలకు వారి ఆర్థిక పరిస్థితులు, స్థానిక వనరులు, ఆసక్తులకు అనుగుణంగా వివిధ జీవనోపాధి యూనిట్లను ఏర్పాటు చేయనున్నారు. మేకల పెంపకం, పాడి పశువుల పెంపకం, కుట్టు మిషన్లు, కిరాణా దుకాణాలు, కోళ్ల పెంపకం, పళ్ల తోటలు, తేనెటీగల పెంపకం, వెదురు ఉత్పత్తుల తయారీ తదితర రంగాల్లో ఉపాధి అవకాశాలు కల్పిస్తున్నారు.
ఆత్మనిర్భరతే లక్ష్యం:
గిరిజన కుటుంబాలకు తాత్కాలిక సహాయం అందించడం కాకుండా, వారు స్వయంగా ఆదాయం సమకూర్చుకునేలా చేయడమే ‘గ్రామీణ ప్రగతి’ ప్రధాన ఉద్దేశ్యమని నిర్వాహకులు తెలిపారు. స్థానిక వనరులను సద్వినియోగం చేసుకుంటూ చిన్న వ్యాపారాలు, పశుపోషణ, వ్యవసాయ ఆధారిత కార్యకలాపాల ద్వారా కుటుంబాల ఆదాయాన్ని పెంచేందుకు చర్యలు చేపడుతున్నట్లు పేర్కొన్నారు. కార్యక్రమంతో మహిళలు, యువతకు కూడా ఉపాధి అవకాశాలు పెరగడంతో పాటు గ్రామీణ ఆర్థిక వ్యవస్థ బలోపేతమవుతుందని తెలిపారు.
కార్యక్రమంలో నాబార్డ్ జనరల్ మేనేజర్ పి. రామలక్ష్మి, నిర్వాహకులు, అధికారులు, ప్రజాప్రతినిధులు, గ్రామస్థులు, లబ్ధిదారులు పాల్గొన్నారు.
