రవి మోహన్‌ స్టూడియోస్‌ వైభవంగా ప్రారంభం

వైవిధ్యమైన సినిమాలతో హీరోగా తనదైన గుర్తింపు సంపాదించుకున్న రవి మోహన్‌ ఇప్పుడు నిర్మాతగా మారారు. ఈ సందర్భంగా రవి మోహన్‌ స్టూడియోస్‌ లాంచింగ్‌ కార్యక్రమం ఘనంగా జరిగింది. ఈ కార్యక్రమానికి శివ కార్తికేయన్‌, కార్తీ, జెనీలియా, రితేష్‌ దేశ్‌ముఖ్‌ తదితరులు ముఖ్య అతిథులుగా హాజరయ్యారు.
ఈ కార్యక్రమంలో రవి మోహన్‌ తన ‘రవి మోహన్‌ స్టూడియోస్‌’ నిర్మాణ సంస్థను అందరికీ పరిచయం చేశారు. అనంతరం తన ప్రొడక్షన్‌లో రాబోతోన్న రెండు సినిమాల గురించి చెప్పారు. ఈ రెండింటిలో ఓ సినిమాను రవి మోహన్‌ తెరకెక్కిస్తుండటం విశేషం.
రవి మోహన్‌ స్టూడియోస్‌ బ్యానర్‌పై ఆయన స్వీయ దర్శకత్వంలో యోగి బాబు హీరోగా ఓ చిత్రం రానుండగా, దర్శకుడు కార్తీక్‌ యోగి దర్శకత్వంలో రవి మోహన్‌, ఎస్‌.జె.సూర్య, అర్జున్‌ అశోకన్‌ ప్రధాన పాత్రల్లో ‘బ్రో కోడ్‌’ మరో సినిమాగా రూపొందనుంది. ఈ మూవీలో ఇంకా గౌరీ ప్రియ, శ్రద్ధా శ్రీనాథ్‌, మాళవిక మనోజ్‌ వంటి వారు ముఖ్య పాత్రల్ని పోషిస్తున్నారు.
ఈ సందర్భంగా హీరో, నిర్మాత, దర్శకుడు రవి మోహన్‌ మాట్లాడుతూ, ‘సినిమా అనేది లక్షలాది మందికి వినోదం మాత్రమే కాదు, ఒక భావోద్వేగం. నాకు నా అభిమానులే ఈ ప్రయాణంలో అండగా నిలిచారు. వారి వల్లే ఈ స్థాయికి వచ్చాను. సినిమాలో నేను ఇంకా సాధించాల్సిన కలలు చాలా ఉన్నాయి. వాటిలో ప్రధానమైనది నా స్వంత ప్రొడక్షన్‌ స్టూడియో. నా సొంత చిత్రాల కోసమే కాదు. యువ, కొత్త దర్శకులకు అవకాశాలను ఇవ్వడం, ఎంతో మంది కలలకు రూపం ఇవ్వాలనేది నా లక్ష్యం’ అని తెలిపారు.