నేడు ప్రపంచ వ్యాపితంగానే ఫాసిస్టు శక్తులు విజృంభిస్తున్నాయి. పచ్చిమితవాద, నయా ఫాసిస్టు శక్తులు మన దేశంలో లాగానే టర్కి, నెదర్‌ల్యాండ్స్‌, ఇజ్రాయిల్‌, అర్జెంటీనా వంటి దేశాల్లో అధికారంలోకి వచ్చాయి. అభివృద్ధి చెందిన ఫ్రాన్స్‌, ఇటలీ, జర్మనీ, అమెరికా వంటి దేశాలలో సైతం మితవాదులు బలపడుతున్నారు. ఉదారవాద ప్రజాస్వామ్యం ఈ క్రమంలో బలహీనపడుతున్నది. దాని స్థానంలో మితవాద, నయాఫాసిస్టు శక్తులకు దారి కల్పించడం 21వ శతాబ్దంలో ఓ ముఖ్య పరిణామం. ఈ నేపథ్యంలో ఫాసిజంను ఎదుర్కోవడం, తుదముట్టించడం గురించి త్రీవమైన చర్చలు జరుగుతున్నాయి. తీవ్రమైన కృషి కూడా జరుగుతున్నది. అందువలన ఈ సందర్భంలో ‘మే 9 విక్టరీడే’ గురించి ఒకసారి మననం చేసుకోవాలి.
విక్టరిడే కు – ప్రపంచ జేజేలు
ప్రతిదేశంలోనూ విక్టరీ డేలు వుంటాయి. కాని మే 9 ప్రపంచ మనవాళి యావత్తు విజయోత్సవం జరుపుకోవాల్సిన రోజు. ఆరేండ్లు సాగిన రెండో ప్రపంచ యుద్ధం 1945 మే 9న ముగిసింది. సోవియట్‌ ఎర్రసైన్యం నాజీ ఫాసిస్టు హిట్లర్‌ (జర్మనీ) సైన్యాన్ని తరిమి తరిమి కొట్టింది. ప్రంపచాన్నే గడగడలాడిస్తున్న జర్మనీ ఫాసిస్టు సైన్యం ఎర్రసైన్యం దాడికి మే 9న లొంగిపోయింది. నరరూప రాక్షసుడు హిట్లర్‌ ఓటమి భరించలేక తన ప్రియురాలితో కలిసి ఆత్మహత్య చేసుకుని చచ్చాడు. యావత్‌ ప్రపంచం ఊపిరి పీల్చుకుంది. ఫాసిస్టు హిట్లర్‌ ఆక్రమించుకున్న 10 దేశాలను, దాదాపు 12 కోట్ల మంది జనాభాని సోవియట్‌ యూనియన్‌ తొలి కార్మిక వర్గ రాజ్యం విముక్తి చేసింది. మే8 వ తేదీన బ్రిటన్‌ అధినేత చర్చిల్‌ సోషలిస్టు రష్యా ప్రజలకు పంపిన సందేశంలో ”నాజీ నియంతను మీ భూ భాగం నుండి తరిమికొట్టడంలో సాధించిన విజయాలకు హృదయ పూర్వకంగా మా అభినందనలు తెలుపుకొంటున్నాను.” అని పేర్కొన్నారు. ఫ్రాన్స్‌ అధ్యక్షుడు డిగాల్‌ ”మార్షల్‌ స్టాలిన్‌, ఐరోపా ఖండంలో యుద్ధం విజయవంతంగా ముగించినందుకు మీ దేశ ప్రజల ధైర్య, సాహసాలకు ప్రశంశలు, ప్రేమభిమనాలు పంపుతున్నాను” అన్నారు. సామ్రాజ్యవాద దేశాల నాయకులే కాదు విముక్తి చెందిన దేశాల నాయకులు కూడా సోషలిస్టు రష్యాకి అశేషత్యాగాలు గావించిన సోవియట్‌ ప్రజలను లేనోళ్ల పొగడటం జరిగింది. యూగోస్లావియా నాయకుడు జోసఫ్‌ టిటో ” మానవ జాతిని కాపాడి, దానికి మంచి భవిష్యత్‌ను ప్రసాదించిన ఎర్రసైన్యానికి , రష్యా ప్రజలకు మా దేశ ప్రజల జేజేలు” అన్నారు. ఆస్ట్రియా దేశాధినేత ” రష్యాలోని సోషలిస్టు వ్యవస్థ, ఎర్రసైన్యం మమ్మల్ని ప్రపంచాన్ని కాపాడినందుకు మేము మా భవిష్యత్‌ తరాలు కూడా ఎంతో రుణపడి వుంటాము.” అని నాడు ప్రకటించారు. ఇటలీ, ఈ యుద్ధంలో హిట్లర్‌ పక్షాన వుండింది. సోవియట్‌ సోషలిస్టు రిపబ్లిక్స్‌ సాధించిన ఈ ఘన విజయం సందర్భంగా రష్యన్‌ ప్రజలకు సెల్యూట్‌ చేస్తున్నాము” అని ఆ దేశ ప్రజలు ప్రకటించారు.
ఫాసిజం – సామ్రాజ్యవాదం – సోషలిజం
ఈ మూడు విడదీయరానివి. సామ్రాజ్యవాద దశను వివరిస్తూ లెనిన్‌ ”ఇది పెట్టుబడిదారీ వ్యవస్థ యొక్క అత్యున్నత దశ, ఇది సోషలిస్టు విప్లవాల దశ” అని నిర్వచించారు. సోషలిజాన్ని, సోషలిస్టు వ్యవస్థను అంతం చేయాలన్నది ఫాసిస్టు లక్ష్యం. దాని పుట్టుక నుండి ఇది కనబడుతూనే వుంది. 1939- 45వరకు ఆరేండ్లపాటు సాగిన రెండో ప్రపంచ యుద్ధంలో నాలుగేండ్లు (22జూన్‌ 1941 నుండి) ఫాసిస్టు జర్మనీకి, సోషలిస్టు రష్యాకు మధ్యే యుద్ధం సాగింది. రెండు శిబిరాలుగా ఏర్పడి తమ లాభార్జనకు, భూమండలాన్ని పంచుకోవడానికి సాగిన మొదటి ప్రపంచ యుద్ధం (1914-18) ముగిసిన 20 ఏండ్లలోనే సామ్రాజ్య వాదులు తమలో తాము తన్నుకుని మరల ప్రపంచాన్ని భయానకమైన యుద్ధంలోకి లాగారు. అమెరికా, ఇంగ్లండ్‌ ఫ్రాన్స్‌లు ఒక వైపు, జర్మనీ, ఇటలీ, జపాన్‌లు మరోవైపు. ఆనాటికి జరిగిన మరో ముఖ్యమైన రెండు పరిణామాలు మన దృష్టిలో వుండాలి. 1. మొదటి ప్రపంచ యుద్ధం ముగిసేనాటికి (1917) తొలి కార్మికరాజ్యం, సోషలిస్టు వ్యవస్థ రష్యాలో ఏర్పడి వున్నాయి. నిజానికి ఈ తొలి కార్మిక రాజ్యం అవతరించగానే తమ దేశం ప్రపంచం యుద్ధం నుండి వైదొలుగుతుందని ప్రకటించడం తోనే యుద్ధం ముగిసింది. ఇక రెండవది ఫాసిజం పుట్టుక, రష్యాలో సోషలిస్టు విప్లవం జయప్రదమై రష్యా అప్రతిహతంగా ముందుకు సాగుతుంటే పెట్టుబడిదారి ప్రపంచం ఆర్థిక సంక్ష్షోభంలోకి దొర్లిపోయింది. ప్రపంచ మానవాళి చూపు సోషలిజం వైపు మళ్లింది. అనేక దేశాల్లో కమ్యూనిస్టు పార్టీలు ఆవిర్భవించాయి. మార్క్సిస్టు సిద్ధాంతం ఔన్నత్యం విస్తరించనారంభించింది. ఈ పురోగమనాన్ని నిలువరించడానికి సామ్రాజ్య వాదం పుట్టించిన సిద్ధాంతమే ఫాసిజం. కమ్యూనిస్టు పార్టీలకు ప్రతిగా అనేక దేశాల్లో ఫాసిస్టు పార్టీలు పుట్టుకొచ్చాయి. ఇటలీలో ముస్సోలినీ, జర్మనీలో హిట్లర్‌, జపాన్‌లో టోజో, స్పెయిన్‌లో ఫ్రాంకో, పోర్చుగల్‌ సల్జార్‌ల నాయకత్వాన ఫాసిజం విజృంభించింది. సరిగ్గా ఆ కాలంలోనే (1925) మనదేశంలో ఫాసిస్టు సంస్థ ఆర్‌ఎస్‌ఎస్‌ పుట్టింది. ఫాసిజాన్ని, దాని ప్రమాదాన్ని నాటి ఉదారవాద ప్రజాస్వామ్య వాదులూ, సోషల్‌ డెమెక్రాట్లు అంటే అనేక బూర్జువా మధ్యేవాద పార్టీలు గుర్తించలేదు. కానీ కమ్యూనిస్టు ఇంటర్నేషనల్‌ సరిగ్గా గుర్తించింది. ” ఫాసిజం శ్రామిక జన బాహుళ్యంపై పెట్టుబడి చేసే అతిక్రూరమైన దాడి. ఫాసిజం అది అతినీచమైన జాతిఉన్మాదం. పచ్చి మితవా దానికి పరాకాష్ట. ఫాసిజం అనేది ద్రవ్య పెట్టుబడి ఆధిపత్యం. కార్మికవర్గం, విప్లవోన్ము భిమైన రైతాంగం, మేధావులపై కక్ష తీర్చుకునే ఉగ్రవాద సంస్థ. విదేశస్తులపై విద్వేషం విరజిమ్మే సంస్థ అని ”కమ్యూనిస్టు ఇంటర్నే షనల్‌, సోవియట్‌ యూనియన్లు ప్రకటించాయి. ఈ పరిపక్వమైన అవగాహన వల్లనే ఫాసిజం ప్రమాదం నుండి ప్రపంచాన్ని రక్షించింది.
మరో పక్క ప్రపంచ యుద్ధానికి పరిస్థితులు దారితీస్తున్నా సామ్రాజ్యావాద దేశాలు ఒకరిపై ఒకరు కత్తులు నూరుకుంటూ కూడా ఫాసిజం, సోషలిజాన్ని నాశనం చేస్తుందన్న విశ్వాసాన్ని ప్రకటిస్తూ వచ్చారు. ఇంగ్లండ్‌ ప్రధాని చర్చిల్‌ 1927లో ఓ సభలో మాట్లాడుతూ ” నేను ఇటలీ దేశస్తుడనై వుంటే మీతోపాటు ఫాసిస్టుగా కచ్చితంగా వుండేవాడిని.” లెనినిజం అనే మృగం ఆకలికి, కోరికలకి వ్యతిరేకంగా మీరు చేస్తున్న పోరాటంలో చివరివరకు మీతో వుండేవాడిని” అని ఫాసిజాన్ని ప్రశంసిం చడం మన గమనంలో వుండాలి. అంతేకాదు, యుద్ధం ప్రారంభమై ఫాసిస్టు హిట్లర్‌ దేశదేశాల్ని ఆక్రమిస్తూ ముందు కొస్తున్నాడు, కలిసిరండని రష్యన్‌ కమ్యూనిస్టు ప్రభుత్వం పదేపదే కోరినా అమెరికా, ఇంగ్లండ్‌లు స్పందించకుండా ఉండిపోయాయి. బీరాలు పల్కిన ఫ్రాన్స్‌ హిట్లర్‌ పాదాక్రాంతం అయిపోయింది. ఇంగ్లాండ్‌ ఇక తమదేశం బలికానున్నదని వణికిపోతున్న తరుణంలో హిట్లర్‌ ఉన్న పళంగా యుద్ధాన్ని రష్యా పైకి మళ్లించాడు. అప్పటికీ మిత్రదేశాలు స్పందించకపోగా సోషలిస్టు రష్యా నాశనం చేయబడితే తమ వర్గ ప్రత్యర్ధి అంతం అయిపోతాడని కలలుకన్నారు. అమెరికా నాటి అధినేత (తర్వాత కాలంలో ఆ దేశ అధ్యక్షుడైన) హరీట్రూమన్‌ ” యుద్ధంలో జర్మనీ గెలిచేటట్లు వుంటే రష్యాకు, రష్యా గెలిచేటట్లుంటే జర్మనీని బలపర్చుదాం. ముందు వాళ్లలో వాళ్లని కొట్టుకుని ఎంత మందిని చంపుకుంటారో చంపుకొనీ” అనడం బట్టి వారి అసలు ఉద్దేశం అర్ధమవుతుంది.
ఏమైనా రష్యానే గెలిచింది
సామ్రాజ్యవాదులు ఎన్ని కుట్రలు, కుతంత్రాలు పన్నినా, సోషలిస్టు రష్యా ఒంటిచేతి మీద ఫాసిస్టు జర్మనీని మట్టి కరిపించింది. రెండు కోట్ల మంది రష్యన్‌లు ఈ యుద్ధంలో సోషలిస్టు వ్యవస్థను కాపాడుకో వడానికి, ఫాసిజం నుండి ప్రపంచ మానవాళిని రక్షించడానికి ప్రాణతర్పణ చేసారు. అసమాన్యమైన యుద్ధ వ్యూహంతో, ప్రజాబలంతో, శక్తివంతమైన సోషలిస్టు సిద్ధాంత పటిమతో రష్యా, దాని అధినేత కామ్రేడ్‌ స్టాలిన్‌ నాయకత్వాన జర్మనీ సైన్యాన్ని ఫాసిస్టు శక్తుల్ని మట్టి కరిపించగలిగారు. ఇక యుద్ధంలో రష్యా విజయం తధ్యమని తేలిపోవడంతో అమెరికా, ఇంగ్లండ్‌లు మల్లగు ల్లాలు పడ్డాయి. 1945 ఏప్రిల్‌ 1న చర్చిల్‌ ” రష్యాగెలిస్తే ప్రజల మనస్సులో రష్యా స్థానం బలంగా పెరుగుతుంది. ఇది మనకు నష్టం కదా! అందువలన ఇక మనం రంగంలోకి దిగాలి. ఇక లోపాయికారిగా జర్మనీ సైన్యం రష్యాను చుట్ట ముట్టడాన్ని చూసీచూడకుండా వదిలేయ కూడదు.” అని సందేశం పంపాడు.
ఈ చరిత్ర ఏం చెబుతోంది!!
ఫాసిజం ఏ రూపంలో వున్నా, ఏ దేశంలోనైనా దాన్ని అంతిమంగా ఓడించగలిగేది సోషలిస్టు శక్తులే. ఫాసిజం అనేది అనుకోని ఓ చారిత్రక ఘటన కాదు. పెట్టుబడి వ్యవస్థ ఆర్థిక సంక్షోభంలో కూరుపోయే సందర్భంలో ఆ వర్గ పాలనే సంక్షోభంలోకి దిగిపోయేటప్పుడు వచ్చే రాజకీయ విధానం. ఈ క్రమంలో ఉదారవాద ప్రజాస్వామ్యం క్రమంగా బలహీనపడుతూ ఓగుణాత్మకమైన పరిణామంగా ఫాసిజం తెరపైకి వస్తుంది అంటారు ఫాస్టర్‌.
వలసకార్మికుల పైన (కాందిశీకుల పైన) మహిళలు, పర్యావరణ వాదులు, ట్రాన్స్‌జండర్‌ల పైన వారి హక్కుల పైన కార్మిక/ కర్షక ఉద్యమాల పైన విషం కక్కుతూ, భౌతిక దాడులు చేస్తూ ప్రారంభమైన ఫాసిజం జాతి ఉన్మాదాన్ని రెచ్చగొట్టి అందలం ఎక్కుతుంది. ప్రముఖ కమ్యూనిస్టు సిద్దాంతకారుడు రజనీపావిూదత్‌ తన గ్రంథం ”ఫాసిజం- సాంఘిక విప్లవం”లో ”బూర్జువా ప్రజాస్వామ్యంపై ఆధారపడి ఫాసిజాన్ని ఓడించలేము. కార్మిక వర్గం పీడిత వర్గాలను కలుపుకుని చేసే పోరాటాల ద్వారానే ఫాసిజాన్ని తుదముట్టించగలం” అన్న మాటలు గుర్తుంచుకుందాం.
ఆర్‌. రఘు
9490098422
