ప్రత్యేకించి వేసవిలో వార్డ్‌రోబ్‌లో దుస్తులు అమర్చే విషయంలో కొన్ని జాగ్రత్తలు తీసుకోవాలి. లేదంటే వివిధ సమస్యలు ఎదురయ్యే అవకాశం ఉంటుంది. ఈ క్రమంలో- వార్డ్‌రోబ్‌ తాజాగా.. పరిమళభరితంగా.. ఉండాలంటే ఎలాంటి జాగ్రత్తలు తీసుకోవాలో తెలుసుకుందాం..
వార్డ్‌రోబ్‌ ఎప్పుడూ తాజాగా, పరిమళభరితంగా ఉండాలంటే లావెండర్‌, జెరానియం.. వంటి అత్యవసర నూనెల్ని అప్పుడప్పుడూ అందులోని ఖాళీ అరల్లో స్ప్రే చేయచ్చు.
లావెండర్‌, జెరానియం, తులసి.. వంటి నూనెలు కలిపి తయారుచేసిన మిశ్రమాన్ని వార్డ్‌రోబ్‌లో ఓ మూలకు ఉంచడం వల్ల కూడా క్లోజెట్‌ సువాసనతో నిండిపోతుంది.
ఓ చిన్న గంధపు చెక్కను వార్డ్‌రోబ్‌ మూలలో ఉంచడం వల్ల కూడా అది పరిమళభరితంగా మారుతుంది.
సహజసిద్ధ పదార్థాలతో తయారుచేసిన సబ్బుల్ని ఒక సన్నటి కాటన్‌ క్లాత్‌లో చుట్టి వార్డ్‌రోబ్‌ కార్నర్‌లో అమర్చాలి. తద్వారా ఈ సబ్బుల నుంచి వెదజల్లే పరిమళాలు అల్మరా అంతా పరచుకుంటాయి.
చిన్న చిన్న రంధ్రాలున్న ఒక జార్‌లో కొన్ని కాఫీ గింజల్ని పోసి.. ఆ జార్‌ని వార్డ్‌రోబ్‌లో అమర్చినా అందులోని దుర్వాసనలు తొలగిపోయి.. క్లోజెట్‌ పరిమళభరితంగా మారుతుంది.
