నవతెలంగాణ – హైదరాబాద్ : సెన్సేషనల్ మువీ ‘భజరంగీ’ నటి, కాంగ్రెస్‌ నేత విద్య (36) సోమవారం రాత్రి దారుణ హత్యకు గురైంది. ఆమెను భర్తే దారుణంగా హత్య చేశాడు. ఈ దారుణమైన ఘటన మైసూర్‌లోని తన ఇంట్లోనే జరిగింది. అయితే నటి విద్య, నందీష్‌ని 2018లో వివాహం చేసుకుంది. వివాహనంతరం కొద్ది రోజులకే వీరిద్దరి మధ్య మనస్పర్థలు వచ్చాయి. తరచూ ఈ జంట గొడవపడుతుండేది. దీంతో విద్య భర్త నందీష్ విడాకులు తీసుకోవడానికి కూడా ప్రయత్నించాడు. కానీ అతని తల్లిదండ్రులు వారిద్దరినీ కూర్చోబెట్టి మాట్లాడి రాజీ కుదిర్చారు. అయినా వీరిద్ధరు గొడవలు పడటం ఆపలేదు. ఈ క్రమంలో తాజాగా వీళ్ళు మళ్ళీ గొడవపడగా… అదికాస్తా.. తారా స్థాయికి చేరుకోవడంతో భర్త నందీష్ విద్యపై సుత్తితో దాడి చేశాడు. తీవ్రంగా గాయపడిన విద్య అక్కడికక్కడే మృతి చెందింది. కాగా .. భర్త నందీష్ అక్కడినుంచి పారిపోయాడు. విషయం తెలుసుకున్న పోలీసులు కేసు నమోదు చేసుకుని దర్యాప్తు చేస్తున్నామని, నిందితుడి కోసం తీవ్రంగా గాలిస్తున్నట్లు తెలిపారు.
