నవతెలంగాణ-హైదరాబాద్: హైటెక్ సిటీ ఫ్లైఓవర్‌పై వేగంగా వెళుతున్న బైక్ ఫ్లైఓవర్ గోడను ఢీకొట్టడంతో వెనక సీటుపై ఉన్న యువతి ఫ్లైఓవర్ పైనుంచి కింద పడి దుర్మరణం చెందింది. మరొకరికి తీవ్ర గాయాలయ్యాయి. కోల్‌కతాకు చెందిన స్వీటీ తన స్నేహితుడు రాయన్ ల్యూకేతో కలిసి జేఎన్‌టీయూ నుంచి ఐకియా వైపు బైక్‌పై బయలుదేరింది. రాయన్ తన వాహనాన్ని వేగంగా నడపడంతో వాహనం అదుపు తప్పి ఫ్లైఓవర్ గోడను ఢీకొట్టింది. ఈ క్రమంలో బైక్ వెనుక సీటుపై కూర్చున్న స్వీటీ అమాంతం గాల్లోకి ఎగిరి ఫ్లైఓవర్ కింద పడిపోయింది. రాయన్ గోడను బలంగా ఢీకొనడంతో అతడికీ గాయాలయ్యాయి. ఇద్దరినీ ఆస్పత్రికి తరలించగా తీవ్రగాయాల పాలైన స్వీటీ చికిత్స పొందుతూ మ‌ృతి చెందింది.
