లక్నో : ఉత్తరప్రదేశ్‌ రాష్ట్రంలో దారుణం చోటుచేసుకుంది. దళిత సామాజిక వర్గానికి చెందిన ఓ మహిళపై ఇద్దరు యువకులు సామూహిక లైంగికదాడికి ఒడిగట్టారు. ఈ దుశ్చర్యను వీడియో తీశారు. ఈ ఘటన బరేలీ జిల్లాలో చోటుచేసుకుంది. పోలీసులు తెలిపిన వివరాల ప్రకారం.. బరేలీ జిల్లాకు చెందిన దళిత యువతి తన స్నేహితురాలికి కొంత డబ్బును అప్పుగా ఇచ్చింది. దాన్ని తిరిగి ఇవ్వాలని కోరింది. దీంతో సెప్టెంబరు 2న ఓ కేఫ్‌కు రావాలని దళిత యువతికి స్నేహితురాలు ఫోన్‌ చేసి చెప్పడంతో ఆ యువతి అక్కడకు వెళ్లింది. అయితే, అప్పటికే తన స్నేహితురాలితో పాటు మరో ఇద్దరు యువకులు కూడా అక్కడ ఉన్నారు. వీరు ముగ్గురూ కలిసి దళిత యువతిని ఓ హోటల్‌కు తీసుకెళ్లారు. అనంతరం ఇద్దరు యువకులు దళిత యువతిపై సామూహిక అఘాత్యానికి పాల్పడ్డారు. ఈ తతంగాన్నంతా వీడియో తీశారు. ఆ వీడియోను అడ్డుపెట్టుకుని ఆమెను బెదిరించడం మొదలుపెట్టారు. రూ.5 లక్షలు ఇవ్వాలని డిమాండ్‌ చేశారు. ఆమె ఇవ్వకపోవడంతో ఆ వీడియోను యువతికి కాబోయే భర్తకు పంపించారు. దీంతో విసిగిపోయిన ఆ యువతి పోలీసులను ఆశ్రయించింది. తనకు జరిగిన అన్యాయం గురించి పోలీసులకు వివరించింది. ఈ మేరకు నిందితులపై కేసు పెట్టింది. బాధితురాలి ఫిర్యాదు మేరకు ఎస్‌సీ, ఎస్‌టీ చట్టంలోని సంబంధిత సెక్షన్ల కింద కేసు నమోదు చేసిన పోలీసులు.. నిందితులందరినీ అరెస్టు చేశారు.
