– సైదగౌని వెంకట్ గౌడ్
నవతెలంగాణ – కామారెడ్డి
కల్లుగీత వృత్తిని రక్షిస్తూ ప్రభుత్వం ఎన్నికల ముందు ఇచ్చిన హామీలను వెంటనే అమలు చేయాలని డిమాండ్ చేస్తూ నిర్వహించనున్న గీతన్న చైతన్య యాత్ర ను జయప్రదం చేయాలని తెలంగాణ కల్లుగీత కార్మిక సంఘం (KGKS) జిల్లా అధ్యక్షుడు సైదగౌని వెంకట్ గౌడ్ పిలుపునిచ్చారు. గురువారం కామారెడ్డి పట్టణంలో నిర్వహించిన సమావేశంలో ఆయన మాట్లాడుతూ, తెలంగాణలో కోట్లాది మంది కల్లుగీత వృత్తిపై ఆధారపడి జీవిస్తున్నారని, కాంగ్రెస్ ప్రభుత్వం ఎన్నికల సమయంలో ఈ వృత్తిని రక్షిస్తామని ఇచ్చిన హామీలను ఇప్పటికైనా అమలు చేయాలని కోరారు. కల్లుగీత వృత్తి రక్షణ కోసం రూ.5,000 కోట్ల ప్రత్యేక నిధిని కేటాయించాలని, ప్రతి గ్రామానికి 5 ఎకరాల భూమిని కేటాయించాలని, కల్లుకు మార్కెటింగ్ సౌకర్యాలు కల్పించాలని ఆయన డిమాండ్ చేశారు.
తెలంగాణ కల్లుగీత కార్మిక సంఘం రాష్ట్ర కమిటీ ఆధ్వర్యంలో ఆగస్టు 2న మహబూబాబాద్ జిల్లాలో ప్రారంభమయ్యే గీతన్న చైతన్య యాత్ర ఆగస్టు 18న జనగామ జిల్లా కైలాషపురంలో ముగుస్తుందని తెలిపారు. ఈ యాత్ర ఆగస్టు 12న కామారెడ్డి జిల్లాకు చేరుకుంటుందని, ఆ రోజు జిల్లా కేంద్రంలో నిర్వహించే భారీ సభకు పెద్ద ఎత్తున కార్మికులు, ప్రజలు హాజరై విజయవంతం చేయాలని వెంకట్ గౌడ్ కోరారు. ఈ సమావేశంలో సంఘం జిల్లా ఉపాధ్యక్షులు రవీందర్ గౌడ్, శంకర్ గౌడ్, స్వామి గౌడ్, జిల్లా కార్యదర్శి రాజా గౌడ్ తదితరులు పాల్గొన్నారు.
