నవతెలంగాణ – కర్నాటక : బస్సు బోల్తాపడి నలుగురు మృతి చెందిన ఘటన కర్నాటకలో ఆదివారం తెల్లవారుజామున జరిగింది. ఈ ప్రమాదంలో 30 మందికి పైగా గాయపడ్డారు. పోలీసుల కథనం మేరకు … నిన్న తెల్లవారుజామున 36 మంది ప్రయాణికులతో ఓ ప్రయివేటు బస్సు బెంగళూరు నుంచి గోకర్ణకు వెళుతుండగా, హౌలాలకెరె టౌన్‌ సమీపంలో బస్సు అదుపుతప్పి బోల్తా పడింది. ఈ ఘటనలో నలుగురు ప్రయాణికులు అక్కడికక్కడే మరణించగా, మరో 30 మందికి తీవ్ర గాయాలయ్యాయి. ఘటనా స్థలానికి పోలీసులు చేరుకొని సహాయక చర్యలు చేపట్టారు. గాయపడినవారిని హెలాల కెరె ఆస్పత్రికి తరలించారు. వారిలో 8 మంది పరిస్థితి విషమంగా ఉందని తెలిపారు. డ్రైవర్‌ బస్సును అతివేగంగా నడపడంతోనే నియంత్రణ కొల్పోయి బోల్తా పడినట్టు చెప్పారు. మృతుల్లో ఇద్దరిని జగదీష్‌ (45), గణపతి (40)గా గుర్తించారు. ఘటనపై పోలీసులు కేసు నమోదు చేసి దర్యాప్తు చేపట్టారు.
