మనోజ్‌ బాజ్‌పాయి ప్రధాన పాత్రలో నటించిన వెబ్‌ ఒరిజినల్‌ మూవీ ‘సిర్ఫ్‌ ఏక్‌ బందా కాఫీ హై’. జీ స్టూడియోస్‌తో పాటు భన్సాలి స్టూడియోస్‌ బ్యానర్స్‌పై వినోద్‌ భన్సాలి, కమలేష్‌ భన్సాలి, విశాల్‌ గుర్నాని, అసిఫ్‌ షేక్‌ ఈ చిత్రాన్ని నిర్మించారు.
అపూర్వ సింగ్‌ కర్కి దర్శకత్వం వహించారు. హిందీలో బ్లాక్‌ బస్టర్‌ విజయాన్ని సాధించిన ఈ చిత్రం యూనిక్‌ కాన్సెప్ట్‌తో రూపొందటంతో దీన్ని ఈనెల 7న తెలుగు, తమిళంలోనూ రిలీజ్‌ చేయగా, అమేజింగ్‌ రెస్పాన్స్‌ లభించింది. ఈ సందర్భంగా సోమవారం మీడియాతో మనోజ్‌ బాజ్‌పాయి మాట్లాడుతూ, ‘ఈ చిత్రం ఇంత పెద్ద సక్సెస్‌ అవుతుందని మేం ముందుగా ఊహించలేదు. ఆడియెన్స్‌ నుంచి అద్భుతమైన స్పందన వస్తుంది. కొందరైతే రెండు, మూడు సార్లు చూస్తున్నారు. ముఖ్యంగా క్లైమాక్స్‌నయితే రిపీట్‌గా చూస్తున్నారు. ఈ చిత్రంలో నేను చేసిన సోలం అనే లాయర్‌ పాత్ర కామన్‌ మ్యాన్‌కు దగ్గరగా ఉంటుంది. అందుకనే ఆ పాత్ర అందరికీ బాగా కనెక్ట్‌ అయ్యింది. ఎన్నో కష్టనష్టాలున్నప్పటికీ దాన్ని చిరునవ్వుతో ఎదుర్కొనే సాధారణ మధ్యతరగతి ప్రజలందరికీ ఈ పాత్ర ఓ ఉదాహరణ. ఈ సినిమాలోని కాన్సెప్ట్‌ను మన చుట్టూ జరుగుతున్న పలు నిజ ఘటనలు ఆధారంగా తయారు చేశాం. అయితే ప్రధానంగా ఈ సినిమా అంతా 16 ఏళ్ల అమ్మాయి చుట్టూనే తిరుగుతుంది. ఆమె తన జీవితంలో ఎదుర్కొన్న ఇబ్బందికరమైన పరిస్థితులను చూపించాం. అలాగే ఆమెకు, సోలంకితో ఉన్న ఓ మంచి అనుబంధాన్ని చూపించే ప్రయత్నం చేశాం. ఏ ప్రజాస్వామ్య వ్యవస్థకైనా న్యాయ వ్యవస్థే మూలస్తంభంలాంటిది. అందుకనే ఈ చిత్రాన్ని లాయర్స్‌కి, న్యాయ వ్యవస్థకి అందించిన నివాళిగా భావిస్తున్నాం. ఈ చిత్రంలో నేను కాకుండా మరో తెలుగు నటుడు ఎవరైతే బావుంటుందని ఆలోచిస్తే.. ఇప్పటికే పవన్‌ కళ్యాణ్‌ లాయర్‌గా చేసి మెప్పించారు. మహేష్‌బాబు అయితే ఈ పాత్రకు సూట్‌ అవుతారనిపిస్తోంది’ అని తెలిపారు.
