ప్రభాస్‌ కథానాయకుడిగా పాన్‌ వరల్డ్‌ సినిమాగా రూపొందుతున్న ‘ప్రాజెక్ట్‌ కె’ చిత్రానికి కమల్‌హాసన్‌ రూపంలో భారీ అదనపు ఆకర్షణ జతగా చేరింది. ఇప్పటికే ఈ సినిమాలో బాలీవుడ్‌ బిగ్‌ బి అమితాబ్‌ బచ్చన్‌ ఓ కీలక పాత్రలో నటిస్తుండగా, బాలీవుడ్‌ అగ్ర నాయికలు దీపికా పదుకొనె, దిశాపటాని స్క్రీన్‌ని స్క్రీన్‌ని షేర్‌ చేసుకుంటున్నారు. ఈ నేపథ్యంలో కమల్‌హాసన్‌ వంటి అగ్ర నటుడు ఈ ప్రాజెక్ట్‌లో భాగం కావడంతో ఈ సినిమాపై సర్వత్రా భారీ అంచనాలు నెలకొన్నాయి. నాగ్‌ అశ్విన్‌ తెరకెక్కిస్తున్న ఈ సైన్స్‌ ఫిక్షన్‌ చిత్రాన్ని వైజయంతీ మూవీస్‌ నిర్మిస్తోంది. ఈ చిత్రంలో కమల్‌ హాసన్‌ కీలక పాత్ర పోషిస్తున్నారని మేకర్స్‌ ఆదివారం అనౌన్స్‌ చేశారు.
ఈ సందర్భంగా కమల్‌ హాసన్‌ మాట్లాడుతూ, ’50 సంవత్సరాల క్రితం నేను డ్యాన్స్‌ అసిస్టెంట్‌, అసిస్టెంట్‌ డైరెక్టర్‌గా ఉన్నప్పుడు నిర్మాణ రంగంలో అశ్వినీదత్‌ అనే పేరు పెద్దగా వినిపించింది. 50 ఏళ్ల తర్వాత మేమిద్దరం కలిసి వస్తున్నాం. ఈ చిత్రానికి నెక్స్ట్‌ జనరేష్‌ బ్రిలియంట్‌ డైరెక్టర్‌ దర్శకత్వం వహిస్తున్నారు. నా సహనటులు ప్రభాస్‌, దీపిక కూడా ఈ తరం వారే. నేను ఇంతకు ముందు అమిత్‌ జీతో కలిసి పనిచేశాను. అయినా ప్రతిసారి కొత్తగానే అనిపిస్తుంది. అమిత్‌జీ తనను తాను కొత్తగా ఆవిష్కరించుకుంటూనే ఉన్నారు. నేను కూడా ఆ ప్రక్రియను అనుకరిస్తున్నాను. నేను ప్రాజెక్ట్‌ కె కోసం ఆసక్తిగా ఎదురుచూస్తున్నాను. ప్రేక్షకులు నన్ను ఏ స్థానంలో ఉంచినా, నా మొదట స్వభావం నేను సినిమా అభిమానిని. నా పరిశ్రమలో ఏ కొత్త ప్రయత్నమైనా ఆ స్వభావం మెచ్చుకుంటూనే ఉంటుంది. ప్రాజెక్ట్‌ కెకి నాదే మొదటి ప్రశంస. మా దర్శకుడు నాగ్‌ అశ్విన్‌ విజన్‌తో మన దేశం, సినిమా ప్రపంచం అంతా ప్రశంసలు మార్మ్రోగుతాయని నేను ఖచ్చితంగా చెబుతున్నాను’ అని అన్నారు
‘నా మనసులో ఎప్పటికీ నిలిచిపోయే క్షణం. ప్రాజెక్ట్‌ కెలో లెజండరీ కమల్‌ హసన్‌ సర్‌తో కలిసి పని చేయడం గౌరవంగా భావిస్తున్నాను. ఇంత గొప్ప వ్యక్తితో కలిసి పనిచేయడం, నేర్చుకునే అవకాశం రావడం కల నెరవేరిన క్షణం’ అని సోషల్‌ మీడియా వేదికగా ప్రభాస్‌ తన ఆనందం వ్యక్తం చేశారు.
నిర్మాత అశ్వనీదత్‌ మాట్లాడుతూ, ‘నా కెరీర్‌లో కమల్‌ హాసన్‌తో కలిసి పనిచేయడం ఎప్పటినుంచో ఉన్న కల. ‘ప్రాజెక్ట్‌ కె’తో ఇప్పుడు ఆ కల సాకారమైంది. కమల్‌ హాసన్‌, అమితాబ్‌ బచ్చన్‌ .. ఇద్దరు దిగ్గజ నటులతో కలిసి పని చేయడం ఏ నిర్మాతకైనా గొప్ప క్షణం. నా కెరీర్‌లో 50వ సంవత్సరంలో ఈ అవకాశం రావడం ఇది నిజంగా నాకు వరం’ అని చెప్పారు.
‘ఇన్ని విలక్షణమైన పాత్రలు చేసిన కమల్‌ సర్‌ కలసి పని చేయడం గౌరవంగా ఉంది. ఆయన ఈ చిత్రంలోకి వచ్చి మా ప్రపంచాన్ని పూర్తి చేయడానికి అంగీకరించినందుకు మేమంతా చాలా సంతోషిస్తున్నాం అని దర్శకుడు నాగ్‌ అశ్విన్‌ చెప్పారు.
