మహిళ మహా పంచాయత్‌ నిర్వహిస్తాం: రైతులు, ఖాప్‌ నేతలు
మండుటెండలో రెజ్లర్ల ఆందోళన నేటితో నెల రోజులకు ఉద్యమం
నవతెలంగాణ -న్యూఢిల్లీ బ్యూరో
46 డిగ్రీల మండుటెండలో రెజ్లర్ల ఆందోళన కొనసాగుతోంది. నేటితో (సోమవారం) ఉద్యమం నెల రోజులకు చేరుకుంది. రెజ్లర్లను లైంగికంగా వేధించినందుకు బీజేపీ ఎంపీ, డబ్ల్యూఎఫ్‌ఐ చీఫ్‌ బ్రిజ్‌ భూషణ్‌ను అరెస్టు చేయాలనే అల్టిమేటం ఆదివారం ముగియడంతో హర్యానాలోని రైతులు, ఖాప్‌ పంచాయతీ నేతలు మహా పంచాయితీ చేపట్టారు. 28న ప్రధాని మోడీ ప్రారంభించనున్న కొత్త పార్లమెంట్‌ భవనాన్ని వేలాది మంది మహిళలు చుట్టుముట్టి మహా పంచాయితీ నిర్వహిస్తారని నేతలు ప్రకటించారు. భవిష్యత్‌ ఆందోళనపై ప్రకటన కూడా ఉంటుంది. హర్యానాలోని రోV్‌ాతక్‌లోని మెహమ్‌ నగరంలో వేలాది మంది పాల్గొనే మహా పంచాయతీని నిర్వహించారు. హర్యానా, రాజస్థాన్‌, పంజాబ్‌, ఉత్తరప్రదేశ్‌ రాష్ట్రాల రైతులే కాకుండా సాక్షి మాలిక్‌, బజరంగ్‌ పూనియా, వినేశ్‌ ఫోగట్‌ తదితరులు కూడా ఇక్కడికి వెళ్లారు. పార్లమెంట్‌ ముట్టడి నిరసనలో దేశంలోని మహిళలందరూ పాల్గొనాలని అగ్రశ్రేణి రెజ్లర్లు విజ్ఞప్తి చేశారు. జాట్‌లు అధికంగా ఉండే రోV్‌ాతక్‌, ఝజ్జర్‌, నార్నాల్‌, ఫరీదాబాద్‌, రేవారీ, చర్కీ దాద్రీ , గురుగ్రామ్‌ జిల్లాల నుంచి వేలాదిగా మహిళలు తరలి వచ్చారు.
డిమాండ్లు ఇవే..
27వ తేదీలోగా బ్రిజ్‌భూషణ్‌ను అరెస్టు చేసి నార్కోటెక్‌ పరీక్ష నిర్వహించాలని మహా పంచాయతీ డిమాండ్‌ చేసింది. 23న ఇండియా గేట్‌ వద్ద క్యాండిల్‌లైట్‌ మార్చ్‌లో పాల్గొంటామని, రెజ్లర్లు అడిగినప్పుడల్లా ఐదు గంటల్లో వేలాది మందిని జంతర్‌ మంతర్‌కు తీసుకువస్తామని నేతలు ప్రకటించారు. మహాపంచాయత్‌లో బీకేయూ నేత రాకేశ్‌ తికాయత్‌ మాట్లాడుతూ.. రైతు ఉద్యమం లాంటి సుదీర్ఘ పోరాటం కోసం ఎదురు చూస్తున్నామని అన్నారు. గాంధీ హత్య కేసులో నిందితుడైన సావర్కర్‌ 140వ జయంతి సందర్భంగా ఆవిర్భావ వేడుకలను ఘనంగా నిర్వహించాలని నిర్ణయించుకున్న బీజేపీకి మహా పంచాయతీ నిర్ణయం ఎదురుదెబ్బ తగిలింది. ఇంతలో, కుస్తీ ఆందోళన కూడా హర్యానాలోని బీజేపీ ప్రభుత్వానికి ఇబ్బంది కలిగించడం ప్రారంభించింది. జాట్‌ రైతుల మద్దతు ఉన్న బీజేపీ మిత్రపక్షమైన జేజేపీతో పోరు మరింత ముదిరింది. ముందుగా జేజేపీ ఉప ముఖ్యమంత్రి దుష్యంత్‌ సింగ్‌ చౌతాలా ఆందోళనకు మద్దతు ప్రకటించారు.
