– రష్యా ఆస్తుల స్వాధీనంపై పశ్చిమ దేశాలలో ‘ఏకాభిప్రాయం లేదు’
వాషింగ్టన్‌ పోస్టు
యూరోపియన్‌ యూనియన్‌ అధికారులు అమెరికా ఒత్తిడికి తలొగ్గి స్తంభింపజేసిన రష్యన్‌ ఆస్తులను ఉక్రెయిన్‌కు బదిలీ చేయడానికి ఇష్టపడటం లేదు. అందుకు ప్రతీకారంగా రష్యా ప్రధానంగా అమెరికా కంటే యూరోపియన్‌ యూనియన్‌ని లక్ష్యంగా చేసుకుంటుందనే భయం వారికి ఉందని శనివారం వాషింగ్టన్‌ పోస్ట్‌ రాసింది. ఉక్రెయిన్‌ యుద్ధం కారణంగా రష్యాపై విధించిన అత్యంత కఠినమైన ఆంక్షలలో భాగంగా స్తంభింపజేసిన దాదాపు 300 బిలియన్ల రష్యన్‌ ఆస్తులను ఉక్రెయిన్‌కు సహాయం చేయడానికి ఉపయోగించవచ్చని చాలా మంది పాశ్చాత్య అధికారులు సూచించారు. ఈ మొత్తంలో ఎక్కువ భాగం ఐరోపా దేశాలలో ఉంది. అయితే అమెరికా వద్ద కేవలం బిలియన్లు మాత్రమే ఉన్నాయి. దీనిని ”దొంగతనం” అని రష్యా అభివర్ణించింది.
ఈ డబ్బును ఎలా ఉపయోగించాలనే దానిపై అనేక ప్రతిపాదనలు ఉన్నాయి. నిధులను పూర్తిగా స్వాధీనం చేసుకోవాలని అమెరికా ముందుకు వచ్చినప్పుడు, యూరోపియన్‌ యూనియన్‌ ఆస్తుల ద్వారా వచ్చే లాభాలను ఉక్రెయిన్‌కు సహాయం చేయడానికి ఉపయోగిం చాలని ప్రతిపాదించింది. ఈ చర్య అంతర్జాతీయ చట్టాన్ని ఉల్లంఘించగలదు, పెట్టుబడి దారులను యూరోను విశ్వసించకుండా నిరుత్సాహపరుస్తుంది, రష్యా ప్రతీకార చర్యలను ఆహ్వానిస్తుంది అనే ఆందోళనల కారణంగా యూరోపియన్‌ యూనియన్‌ అధికారులు రష్యన్‌ ఆస్తులను జప్తు చేయడానికి ఇష్టపడటంలేదని వాషింగ్టన్‌ పోస్టు పేర్కొంది.
స్తంభింపజేసిన ఆస్తులలో ఎక్కువ భాగం యూరప్‌లో ఉన్నందున నిధులను స్వాధీనం చేసుకోవాలనే అమెరికా ప్రతిపాదనను వారు వెనక్కి నెట్టారు. ఏదైనా రష్యా ప్రతీకారం బహుశా ఐరోపాపై పడవచ్చు, అమెరికాపై కాదు. యూరోపియన్‌ యూనియన్‌, అమెరికా రెండూ ఉక్రెయిన్‌ కోసం మరింత చేయవలసి ఉంది. కానీ ఏమి చేయాలనే విషయంపై ఏకాభిప్రాయం లేదు. ‘మేము ఈ నిధుల సమస్యకు స్థిరమైన మధ్యస్థ-దీర్ఘకాలిక పరిష్కారంగా రష్యన్‌ సార్వభౌమ ఆస్తుల గురించి ఆలోచిస్తున్నాము’ అని పేరు చెప్పటానికి ఇష్టపడని అమెరికా ట్రెజరీ అధికారి అన్నారు. అమెరికా ప్రతినిధుల సభ శనివారం ”ఉక్రెయిన్‌ పునర్నిర్మాణ ఆర్థిక శ్రేయస్సు, అవకాశం చట్టం”ను ఆమోదించింది.
ఇది అమెరికా బ్యాంకులలో రష్యన్‌ ఆస్తులను స్వాధీనం చేసుకోవడానికి, వాటిని పునర్నిర్మాణం కోసం ఉక్రెయిన్‌కు బదిలీ చేయడానికి అమెరికా అధ్యక్షుడు జో బైడెన్‌ను అనుమతిస్తుంది. రష్యా ఆస్తులను స్వాధీనం చేసుకుంటే అందుకు ప్రతిస్పందన తీవ్రంగా ఉంటుందని, అది ప్రయివేట్‌, ప్రభుత్వ ఆస్తుల అనుల్లంఘన సూత్రానికి వ్యతిరేకమని, అలాగే అమెరికా ప్రతిష్టకు కోలుకోలేని నష్టం కలిగిస్తుందని క్రెమ్లిన్‌ ప్రతినిధి డిమిత్రి పెస్కోవ్‌ హెచ్చరించాడు.
